travel/phd/phd01s.jpg" alt="中華民國國慶日" align="center" style="padding:10px" />
中華民國國慶日，又叫做雙十節、雙十國慶、雙十慶典等，係紀念1911年10月10號發生嘅武昌起義嘅慶典。起義之後嗰兩個月，中國各地革命行動成功，瓦解咗清朝帝制政府，響1912年1月1號開創民主共和嘅中華民國。
呢日係中華民國嘅國定假日之一，當地政府亦每年舉行慶典。而家響中國大陸以外嘅世界各地，好多華人都會響呢日舉行慶祝活動。當中美國芝加哥同埋三藩市嘅唐人街會舉行慶祝遊行，紅色嘅雙十圖案係常見嘅裝飾。
香港響1997年主權移交畀中華人民共和國之前，市民可以自行舉辦慶祝雙十節活動。1946年至1949年嘅10月10號，更曾經係香港嘅公眾假期。1997年之前，響中華民國支持者聚居嘅地區，例如調景嶺、荃灣等，街上更往往可見中華民國國旗嘅旗海。不過1997年之後，特區政府雖然未有明文禁止相關嘅活動，但係街上掛出嘅相關橫額、旗幟等都會畀警方以「佔用政府空間」為由拆除。而相關單位響籌辦慶祝活動嗰陣都會同當局有一定嘅「政治默契」，多會選擇以私人場合形式舉行，免除特區政府嘅「尷尬」。