粵語白話文（似乎係講緊「三及第」）係粵語嘅書面語，同粵語口語嘅語法、詞彙、句式吻合，一般認為佢嘅出現唔遲過現代漢語中以北方方言為代表嘅白話文。1949年前，粵語地區，包括廣東，廣西和海外華人社區民間，粵語白話文已經非常盛行，直至1950-60年代才漸漸由政府規定嘅現代漢語白話文取代。宜家，香港、澳門同埋廣東、廣西各地民間仍然有唔少人用緊。港產電影嘅字幕亦多數係粵語白話文。讀起上黎特別得意同貼近一般市民嘅生活.
已故香港作家黃霑有好多作品都係用粵語白話文寫作而成，譬如話散文集《不文集》、小說《香港仔手記》、歌詞《問我》等。許冠傑嘅歌曲中有相當部分用粵語白話文填詞。已故香港作家/填詞家林振強曾將徐志摩嘅現代漢語詩歌翻譯成粵語白話文，譯作別有一番風味。
粵語白話文採用粵語自己嘅詞彙、語法、句式。

規範
由於欠缺政府採納同支持，又缺乏專門嘅規範機構，好多人寫粵語白話文成日出現錯別字，或者索性攞同音字及英文">英文（字母）代替，令到書寫都幾混亂。就算係咁，約定俗成嘅「標準」都重係有既。喺第二次世界大戰前後，由於嗰時嘅粵劇係少數將粵語寫出嚟嘅文字紀錄，呢啲粵劇劇本或者戲院嘅電影介紹成為咗非官方嘅規範標準，得到大眾嘅依從。
1980年代，香港嘅電視節目《每日一字》有幾集都提出過粵語有很多講法其實係好古雅架。節目主持林佐瀚重去圖書館翻查呢啲字嘅正音、正寫，喺節目度介紹畀大家添。有唔少嗰陣時俾人遺忘咗嘅古字，例如「攰」（累咁解）呢一個字就係咁樣翻生（如果根據《廣州話字典》，呢個字俾人寫成「癐」）。從此，香港嘅語文工作者開始咗新一輪嘅「正字正音運動」，重喺好多份報章入面要求傳媒一定要「寫正字、讀正音」添。