易經，或者單叫易，一般指現今只流傳嘅周易，係最古老嘅中文書。易係讀貿易個易，係指變化。佢係古代中國嘅宇宙觀兼哲學，係中國文化嘅中心。呢套哲學嘅中心係陰同陽，兩股相反嘅性質之間嘅動態平衡 ，當事件嘅演變係一種過程，同變化本身係永恆不變。易經行文似係占卜著作。
多數人相信易經係中國周代成書，所以叫周易。而司馬遷響史記度寫周文王所編，不過後世考證唔係同意呢個講法。易經到東周戰國時代，已經唔係一睇就明，所以另外有人寫本易傳來解譯易經。家下易經通常都係兩本內容夾埋一齊。
易呢本書對中國生活有好大影響，政治，經濟，軍事，醫學等等唔同範疇都受佢影響。儒家道家家都推崇易經。因為易有兼有占卜同哲學兩種特質，古人都響呢兩方面着手研究，一派着重占卜，叫象數派，而另一派着重哲學，叫義理派。易經後來衍生好多研究，出名嘅河圖洛書、太極圖都係其中之一。
由另一方面睇，易經有好多人生智慧，經常被引用。「天行健，君子以自強不息；地勢坤，君子以厚德載物。」(孔子《繫辭》乾；坤)就係清華大學嘅校訓。
金庸降龍十八掌嘅名堂，嚟自《周易》爻辭。其中「亢龍有悔」嚟自乾·上九。